Och dëse Summer mécht eisen Äerzbëschof Jean-Claude Hollerich sech mat Jonken op de Wee. Dës Kéier geet et op de Spuere vum Franz vun Assisi op Assisi an Italien.
Op de Spuere vum Franz vun Assisi
Pilgerfahrt fir Jonker vum 17. - 31. Juli 2015
Och dëse Summer mécht eisen Äerzbëschof Jean-Claude Hollerich sech mat Jonken op de Wee. Dës Kéier geet et op de Spuere vum Franz vun Assisi op Assisi an Italien.
Op de Spuere vum Franz vun Assisi: dat heescht sech op de Wee maachen, op ee Pilgerwee maachen. Dëst kann een op 2 Manéiere maachen: am Goen an am Vëlofueren.
Déi éischt Woch si mer opgedeelt an ee puer Gruppen, déi sech vu Norden a Süden op de Wee maachen, fir no enger Woch zesummen zu Assisi unzekommen.
Zu Assisi ass dann Zäit, dat Erlieften ze verschaffen, an d'Déift ze goen an sech mat Assisi, mam Franziskus a sengem Message ausernaner ze setzen.
Op eiser Rees geet et drëms, fir sech op dat einfacht Liewen anzeloossen. Dobäi kann ee ganz direkt spieren, wat am eegene Liewe wierklech wichteg ass, wat een dréit a wat ee vläicht dovun oflenkt. Wien sech dobäi op d'Sich mécht, kann entdecken, wou Gott sech a sengem Liewe weise wëllt.
Programm:
De Programm vun der Rees ass ofwiesslungsräich:
- Déi éischt Woch si mer ënnerwee a Richtung Assisi. Um Wee gëtt et vill ze entdecken. Interessant Uertschaften, Plazen, op deenen de Franziskus passéiert ass. Beim Trëppelen ass Zäit fir d'Kollegen an d'Kolleginne besser kennenzeléieren, sech mat verschiddene Froen ze beschäftegen.
- Wat huet dat mat mengem Glawen ze dinn? An der perséinlecher Relecture an an der regelméisseger Feier vun der Mass versiche mir op de Ruff vu Gott ze lauschteren.
- Tëschenduerch gëtt et ëmmer nees Momenter, wou mir äis erhuelen an déi eng oder aner touristesch Attraktioun erliewe wäerten.
Praktesch Informatiounen:
Alter: Dës Rees ass fir Jonker a jonk Erwuessener vu 15 Joer un. Wie méi jonk ass an awer deelhuele wëllt, soll sech w.e.g. beim Uwe Franzen mellen.
Datum:
Départ ass de 17. Juli um 19 Auer um P&R Howald. Retour ass den 31. Juli géint 20 Auer.
Präis:
D'Participatioun un der Rees kascht 650 Euro. Déi tatsächlech Käschte leien awer méi héich. Jiddereen dee kann, ass dofir häerzlech invitéiert nieft den 650 Euro och en Don un d'Fondation Sainte Irmine fir de Projet „Assisi 2015“ ze maachen. De Service de la Pastorale organiséiert bis de Summer eng Rei vun Aktivitéite fir Suen ze sammelen, z. B. e Spendelaf, eng Auto-Wäsch-Aktioun, de Verkaf vun Iessen a Gedrénks virun engem Supermarché. Duerch säi perséinlechen Asaz huet hei jiddereen d'Geleeënheet, fir esou en Deel zum Gesamtpräis vun der Rees bäizedroen.
Preparatioun:
Wien un dëser Rees deelhuele wëllt, engagéiert sech och, fir un der Preparatioun deelzehuelen. Zur Preparatioun gehéieren:
- Participatioun un der Schlussprëssessioun vun der Oktav, den 10. Mee 2015
- e Weekend vu sonndes, de 24. Mai bis dënschdes, de 26. Mai 2015 (mat Participatioun un der Sprangprëssessioun)
Umeldung:
bis den 1. Mee 2015 mam Formulaire op der Récksäit vum Flyer an dem Iwwerweise vu 300 € op de Kont:
CCPLLULL IBAN LU49 1111 0036 5061 0000
De Rescht vum Betrag ass fir de 15. Juni 2015 ze bezuelen.